كل سنة وأنت طيبة.. النهاردا هنحاول الإجابة عن سؤال: ازاي نتجنب الجفاف وضربات الشمس واحنا سايقين في الصيام من خلال اختيارنا للملابس المناسبة للقيادة في أجواءنا الحارة.
أولا: الأولوية للملابس القطنية و الكتان، لأن القطن والكتان مواد طبيعية نسيجها بسيط ورقيق على البشرة، ولا يسبب التهابات للجلد أو حساسية، غير أنها بتمتتص العرق، على عكس معظم الأقمشة والألياف الصناعية اللي كتير بتسبب التهابات جلدية وحكة (هرش)، و دا بيسبب احتباس الحرارة في جسمنا، وبيزيد شعورنا بالحرارة و الرطوبة.
ثانيا: اختيار الألوان، وفي الصيف الألوان الفاتحة هي اللي بتكسب، لانها بتعكس أشعة الشمس ومش بتمتص الحرارة، على عكس الألوان الغامقة.
دا غير التأثير النفسي للألوان الفاتحة المرتبطة بالتفاؤل و السعادة، و دا بيولد طاقة إيجابية بتقلل التوتر.
وفي مهرجان الألوان، الأزرق و الأخضر الفاتح والأصفر والوردي دائماً بيتصدروا المقدمة. وطبعا الستات مايتوصوش في الألوان الجميلة!
ثالثا: الملابس الطويلة و المريحة بتكون الأفضل لانها بتغطي الجلد و تحميه من أشعة الشمس وأضرارها.
ومن الاخر، ابسط اختيار عملي هو قميص قطن أبيض طويل، حيستوفي كل الشروط، و شكله شيك!
بقلم: د. كريم النحاس
مدرس و استشاري أمراض النساء و التوليد بالمركز القومي للبحوث