كيف تستورد سياره مالك اول من اوروبا بنفسك ؟

23 يناير 2019

كيفية استيراد سياره

تغيير حجم الخط

اذا كنت تبحث عن الاجراءات الكاملة والشروط لاستيراد سيارة مالك اول من اوروبا واجراءات تخلصيها فى مصر بعيدا عن التجار فتابع معنا المقال التالى علي الحياة الان والذي نوضح فيه بالتفصيل ماهو مطلوب :

شويه خطوات تتبعها وانت اللي كسبان... بدل ما تقع في جشع تاجر السيارات هنا في مصر

- لازم السيارة تكون بشهادة منشأ اتحاد أروبى.

- لازم تحصل علي (برفورما انفويس) فاتورة مبدئية يعنى ودي بتكون يا اما فاتوره شامله سعر الشحن او لا، وده بيكون مذكور في الفاتوره

- فوب (يعنى على ظهر المركب فى ميناء الشحن)

او

- سيف (يعنى واصل أسكندرية متضمن سعر الشحن والتأمين)

تمام لحد كده؟؟؟

- تاخد المستندين المذكورين دول وصورة بطاقتك وعلى البنك وتفتح حاجة اسمها اعتماد مستندى بناءا علي المستندات اللي معاك حيتفح الأعتماد.

هتبعته للى حتشترى منه هناك في اوروبا (صاحبك ابن عمك هيتوسطلك في القصه دي هناك) اول ما يشحن العربية ويبعت المستندات الأصلية للبنك مباشرة البنك يحول الفلوس.. مابعتش يبقا مفيش تحويل.

- معاك حاليا مستنداتك بعد الدفع تطلع انت على جمرك السيارات اللى فى مطار القاهرة.. قبل البوابات تدخل يمين.. يعنى مش تخش المطار.. اسأل على جمرك السيارات قبل الكارتة حيقولك خش يمين.. تروح تقولهم عايز اعمل افراج مسبق. إفراج اية؟؟ افراااااج مسبق؟؟ علشان متتبهدلش فى الجمارك فى اسكندرية ... ودى المستندات.

- الجمرك حيحددلك الرسوم والضريبة وكل المصاريف تدفع كل المصاريف وتاخد إذن الإفراج الجمركى المبدئى فى ايد حضرتك.

- لما توصل العربية الميناء تاخد اجازة يومين او تلاتة بالكتير.. وتروح اسكندرية تدخل الميناء وتشوف اى مستخلص علشان يحط اسمه على الورق وكل اللى حيعمله معاك حيفتحلك شهادة.

- بالشهادة دي تروح بيها على الجمرك ياخدوا بصمة الشاسية والموتور زى ما بيحصل فى الفحص كدة فى المرور اول ما يلاقيها مطابقة يعملك افراج نهائى وتستلم عربيتك. لو مكنش فى نفس اليوم يبقا تانى يوم بالكتير..

- تحط فيها بنزين خمسة وتسعين بلاش استخسار.. وتركب عربيتك وتوصل بألف سلامة لأقرب مرور ليك اللى انت تبعه.. تدخل عليهم تشترى دوسية فحص. وتقف فى الطابور وتحط اذن الإفراج فى الدوسية وحياخدوا البصمة. والبيانات حتوصلهم اوتوماتك من الجمارك. تدخل تدفع الضريبة ورسوم الرخصة. وتطبع الرخصة وتروح على البيت وبكده انهيت قصه استيرادك للسياره بنفسك.

المهم نقطع صوابع التوكيلات المفترية دي وبدل ما نقول خليها تصدي... احنا نسعي نجيب حاجتنا بايدينا..

صحيح نسيت اقولك.. ممكن حضرتك تانى يوم تبيع العربية عادى.. وتشترى واحدة تانية.. وممكن عادى برضوا تشترى واحدة تانية وانت معاك الأولى. بس بلاش استنصاح.. وتشترى نفس الموديل.. حتتقفش فى الجمرك ومش حيفرجوا عنها.. حيقولك انك تجار.. لكن لو موديل تانى حتقوله انا حر عايز مودلين. عادى يعنى....

وكمان من حق المدام او والدك او اختك يجيبوا على اسمهم بنفس الطريقة.. ويبيعولك العربية عادى جدا برضوا بس بعد الإفراج الجمركى.. يعنى ممكن تبيع العربية اول ما تستلم الأفراج والمشترى يرخص بأسمه.

لغايه هنا والدنيا تمام... طيب لو حابب تعرف اسعار السيارات في اوروبا عامله ايه... هقولك سهل جدا ممكن تخوش علي اكثر من موقع او تنزل كذا ابلكيشن ع الموبيل هتقدر من خلالهم تدور علي الموديلات ذات المنشأه الاوروبي ( سكودا-فولكس واجن - فيات-بيجو- رينو...) وهتقدر تقييم الفلوس اللي معاك هتجيب بيها ايه مع العلم انك هتضرب اليورو بسعر الصرف الحر اللي هو ٢٠ ج وكسور وشوف الدنيا هتجيب معاك ايه.

جميع حقوق النشر محفوظة لدى مؤسسة الأهرام، ويحظر نشر أو توزيع أو طبع أي مادة دون إذن مسبق من مؤسسة الأهرام
>