ياللى أنت صابر على الوجع..؟

دينا ريان 7 مايو 2018

تغيير حجم الخط

ياللى أنت صابر على الوجع.. كمل جميلك و...!؟
مش عارفة؟
لا أستطيع فك الخط!
عشت وشفت وجاء اليوم الذى اتعقب فيه ميكروباص ولا أستطيع فك الحكمة أو اللغز أو المثل الشعبى أو حتى الافتكاسة المكتوبة من أيام ما كانوا بيكتبوا:«الصدق منجى» بالياء.
بدلا من الصدق منجاه.
وكنت دائما أسأل نفسى لماذا «ثمرة المانجو» بالذات التى اتحفوا بها الصدق ووصفوه بأنه منجى!؟ يمكن لأنها أجمل فاكهة..؟ يمكن لأنها أغلى؟ طيب كان فى الإمكان قول:
الصدق فراولة.
الصدق قشطة.
الصدق موز.
الصدق كاكا.
الصدق عنب.
وأفقت من التساؤلات وأنا أقف «وشى» فى ظهر الميكروباص أحاول معرفة «كمالة» المثل.. ياللى أنت صابر على الوجع ـ كمل جميلك و....؟ إيه؟
وفضلت اقترب واقترب واقترب وهباااه فرمل الميكروباص مرة واحدة ووجدت نفسى ملتصقة بظهره مثل كرتون توم آند جيرى.. ولأن عربتى حديد! وما تتخيرش عن عربته المسلحة وجدت السائق نازل «مشمر درعاته» وهو يرتدى تى شرت مخطط مثل المغامرون الخمسة زمان وعلى رأى عبد المنعم مدبولى لما قال فى المسرحية بيقولوا غيبوبة.
لا لا.. بصراحة الراجل لم يضربنى وحمدت الله إننى ست كبيرة ولأول مرة ألاقى لها فايدة! بالإضافة إلى محفظتى التى أخرجتها وكأننى أرفع راية السلام مع الاستسلام والانبطاح والانهزام وقلت له:
احنا الخنافس يا يبه بعد ما عجزوا يا بييه.. أنا كنت عاوزة أعرف كمالة المثل اللى سيادتك يا يبه كتبه على ظهر الميكروباص بتاع سيادتك يا يبه؟ وبمنتهى الأرف وهو يعد الفلوس رد عليه:
ما هى واضحة؟ اهيه.
ياللى أنت صابر على الوجع.. كمل جميلك و«ابتسم»!! ابتسم؟ بس دى مش حروف ابتسم؟
لا دى مش حرووف دى «رسمة بالحروف» وعن إذنك بقه مليتوا البلد مش عارفين تفكوا الخط!!

جميع حقوق النشر محفوظة لدى مؤسسة الأهرام، ويحظر نشر أو توزيع أو طبع أي مادة دون إذن مسبق من مؤسسة الأهرام
>