بدأ فصل الشتاء وبدأت الأمطار وأصبح السكوتر عند بعض البنات وسيلة تنقل أساسية خاصة بعد إرتفاع أسعار السيارات، كما أنه وسيلة تنقل سريعة وسط الزحام.
وبسبب أن ثقافة السكوتر بالنسبة للبنات حديثة فى مصر إلا أن وعيهن بوسائل الأمان والحماية شديد وكأنهن محنكات فى اختراق شوارع مصر بالسكوتر.
فى الفترة الأخيرة إنتشرت متاجر بيع اكسسوارات السكوتر ومنهم من خصص أقسام لبيع منتجات السيدات أيضاً.
هل سمعتى عن الرين بونشو للحماية من مياه المطر أثناء مشوارك بالسكوتر؟ هذا كان استفسار أهرام أوتو من قائدات السكوتر وهنا تقوم البنات المصريات بإعطاء النصائح عند إستخدام واقى المطر أو الرين بونشو.
تقول شاهنده أيمن "الرين بونشو موجود دلوقتي في جميع معارض بيع اكسسوارات الاسكوتر وتمنه معقول ممكن اي حد يجيبوا معظمنا بنلبسه وقت الشتا".
وتضيف شاهنده "هو طبعا مفيد جدا بيحمى مش بس من الشتا انا ساعات بلبسه لو لابسه لبس فاتح مثلا وخايفة انه يتبهدل فهو بيحميكي من العوادم والتراب والطينة ويوجد منه أنواع كثيرة".
فى حين تقول إيناس حمدى بصراحه هو فعلآ بيحمى من المطر وبهدلة الشتا بس هو خطر جدآ على إللى سايق لانى مكنتش عارفه اخد راحتى فى السواقه والملفات كانت صعبه قوى فلازم الحذر الشديد وانتى لابساه او ميتحطش على وش الموتوسيكل وده هيكون آمن وافضل".
بينما كان رأى هبة أحمد أنها تستخدم البديل الآمن أثناء القياده وهو رين كوتrain coat الذى عبارة عن جاكيت ووتر بروف تقوم بارتدائه فوق الملابس للحماية من المطر وهو يصل إلى الركبه. أما بالنسبة ليديها فهى ترتدى قفاز من الجلد.
وتنصح هبة "وقت الأمطار الشديدة دا فعلا بيحمي الهدوم من المطر والطينة وده النوع اللي معظمنا بيستخدمه وساعات بنستخدمه كحماية للهدوم عامة لو لابسين حاجة مش عايزينها تتبهدل واحنا سايقين مثلا لانه خفيف ومش بيضايق خالص"
بينما كان رأى ميادة الخولى "أنا لو الدنيا بتنزل جليد لا يمكن اعمل في نفسي كدة انا الناس بتضحك اتوماتك لما بتلاقي واحدة ست راكبه اسكوتر اقوم كمان اعملهم فضائيه" .
إختلفت آراء البنات حول كيفية حماية أنفسهن من الامطار وتحدى الظروف المحيطة وركوب السكوتر أو صفه فى الجراج وركوب وسيلة مواصلات مغلقة فى يوم الامطار. ورغم الاختلاف تبقى الفتاة المصرية بمليون راجل وتستطيع التصرف فى معظم الظروف.
